interview75

王菀之專訪〔75〕


2015年8月14日 都市日報

追夢 王菀之 蔣志光

蔣志光(蔣Sir)與另一位好拍檔王菀之(Ivana),最近合作新戲《沒女神探》,不難解讀的是一個演沒女,一個演神探,但兩人的共同點是,估佢唔到。

歌手出身的王菀之,踏入電視和電影圈,不單止令觀眾眼前一亮,她更一口氣獲得今屆香港電影金像獎「最佳新演員」和「最佳女配角」兩個獎,實屬難得。

至於蔣志光在電視劇中騷唱功,大家如發現新大陸,其實蔣Sir未當歌手前,曾經當過副導演,再次接觸電影的他,還有一個未完成的夢,「我想做導演。」

憑電視劇《老表,你好hea!》重唱學友舊歌《愛是永恆》技驚四座,接着更惡搞自己首本名曲變成《相逢何必曾燒衣》,引來80、90後一輩關注蔣志光,不單止人氣升,還帶挈他拍廣告、拍電影和開演唱會,荷包也進帳不少。

繼續追夢

談到電影,蔣Sir最初輕描淡寫的說:「都有好幾年冇拍,感覺點?唔識點講,或者冇以前咁緊張,可能喺電視訓練得多。」跟蔣Sir談到當年他未當歌手之前,其實做過電影幕後,甚至做過副導演,問他若有機會想當電影幕後哪個崗位,蔣Sir二話不說謂:「當然係做導演,今時今日我都係想做導演!哈哈,呢張支票太耐啦,所以我都唔敢講,當我朝住導演呢個目標時,發覺人同人之間緊密咗,但好似對件事卻愈來愈遠,做導演係要有好好嘅溝通技巧,我唔夠膽多講,但係喺任何一個崗位,我都會注意同了解,即使係一個茶水、燈光、攝影,我都要了解佢哋嘅需要同難處。」

做導演是他未來的目標嗎?蔣Sir認為變數太多,不敢寄予厚望,「當我寫好劇本後,可以拍啦!但經過幾個月後,可能成個劇本又要斬咗一半,劇本係冇消失,但喺自己腦海中,一直改一直改,未能成形畀觀眾睇,加上拍一部戲,要諗有冇商業嘅元素,變咗好似計數咁,所以我唔敢講,因為太多空頭支票。」

另類拍檔

既然想當導演,問蔣Sir會否找Ivana演出?蔣Sir一直笑,而Ivana則說:「咁真係要問導演有冇興趣搵我啦!」蔣Sir笑謂:「啱啱我先同佢講,佢好適合做某一個角色,係有啲神經質。」蔣Sir究竟最想拍哪類題材,他坦言有興趣去探討人性, 「我一直都好想翻拍導演許鞍華1979嘅作品《瘋劫》,點解?其實精神病喺呢個世界每個角落都會有,好值得我哋去探討佢哋嘅情緒,可能喺角度同手法上,要考慮點樣處理。」對於今次同Ivana合作,蔣Sir不禁以導演口吻說:「以導演嘅眼光嚟睇演員,的確係好需要有Surprise嘅演員,演員嘅價值唔係導演想你點做,而係你有幾多種演法畀導演選擇。(對Ivana嘅評價?)佢絕對做到,估唔到佢嘅爆炸力係咁大!」蔣Sir也好奇問Ivana:「我都想問吓你,係咪喺安全環境下,一Roll機你就冇顧慮咁放膽演?」Ivana細想一下才說:「我只係想做一個演員,抱住呢個心態,一Roll機就全力以赴。」蔣Sir又謂很欣賞Ivana有個人和特別之處,就是每次都有不同的演繹,他說:「人哋Roll機就機械式去演,比較公式化,但係睇到佢一次比一次有調節,好玩就係咁。」而Ivana坦言接了拍戲工作後,不會想太多, 「一Roll機我就唔識得去分心。」

同道中人

今次Ivana在戲中飾演臥底女警要去扮嫩模,被聯想到早年楊千嬅主演的電影《新紮師妹》,Ivana可擔心有千嬅的影子而被比較?她說:「我好似有睇過千嬅嗰套,但我完全唔識得分析咁多嘢,只係知道自己要做好每一場戲。」談到在戲中體會當嫩模,Ivana直言:「真心覺得係好難,拍之前我有請教連詩雅佢哋,好似擺甫士我真係唔識,佢哋係會研究角度,點樣嘅構圖係最靚。」

戲中她演女警,而蔣Sir是她上司,所以兩人對手戲特別多,Ivana說:「同蔣Sir好有默契,拍得好開心,好多時我都唔驚得咁多,只知道我唔放啲去做,唔知可以點,所以我好珍惜每次機會。」其實蔣Sir和Ivana同樣是歌手也是演員,兩人都是性格溫文的藝人,似是跟娛樂圈格格不入,卻又能夠突圍而出,發展也愈來愈好,Ivana說:「我好感恩遇到好多好人,可以畀到我學習。」蔣Sir也很謙虛的說:「搵到出路係後話,對自己要有交代, Enjoy個過程,自己亦都會做得舒服,所以結果唔重要,反而過程更加重要。」

撰文:Ling

攝影:Eddy

化妝:Janice Tao @ ZING the makeup school(王菀之)

髮型:Tim Lee @ Hair Culture(王菀之)

服裝:PAPAMAMASON(王菀之)

場地:Coffee Pro

圖:王菀之在新戲要扮嫩模。

圖:周柏豪飾演Ivana的經理人,兩人日久生情。

圖:蔣志光在戲中扮鬼扮馬,同Ivana齊齊發放笑彈。


2015年8月18日 經濟日報

王菀之 周柏豪專訪 2揀1

人生,往往係要2揀1。(好似係)王菀之與周柏豪在喜劇《沒女神探》中,前者扮演警花阿寶,為當臥底查案被迫做 o靚模;後者飾演冇實權的乸型二世祖,被迫要捧一班 o靚模。現實中,7件要佢哋二選一的事,佢哋寧願點揀?

王:王菀之  周:周柏豪

1. 寧願演喜劇 or 悲劇

王:以前一定答悲劇,因鍾意睇dark嘢、着重人性描寫嘅故事。唔知點解我明明係阿愁,但大家擺我去演喜劇,初初唔慣,慢慢就睇到喜劇嘅意義。入場見觀眾睇得開心就驚訝:「咩原因令自己做咗啲咁好嘅事?」平時生活已經好沉重,喜劇唔止令佢哋於戲院開心兩個小時,之後仲可以同朋友分享。而家先知喜劇除咗描畫到人性外,係功德嚟。

周:喜劇,因為我好易受身邊事影響,演悲劇嗰排個人都會唔開心,如之前主演《四非》,那段日子個情緒會受影響,覺得好攰、好唔開心,但演喜劇係拍嘅時候笑到攰。同埋見到觀眾笑係好快樂嘅事,做藝人,不外乎想帶娛樂畀人,演喜劇係直接達到呢個目的。

2. 寧願伴侶係Man爆/女漢子 or 乸型/小鳥依人

周:真係揀唔到,因每個人於唔同時候都有唔同性格,我對住阿媽都仲係細路仔咁。當然希望另一半對住我時好溫柔,小鳥依人;在我軟弱時,突然有個superman出嚟係好正,如我好驚曱甴,如果遇到都想另一半一手捉住隻曱甴。

王:希望另一半man啲,因為man呢個字包含好多good quality,即有責任感、成熟思想、包容,唔止話大隻咁表面,所以話一個男仔好man係已經好好嘅形容。

3. 寧願做上司 or 下屬

周:好難揀,但一定要揀就揀上司,我幾承受到壓力,反而在壓力下逼到潛力。如果做下屬被人點,會覺得有個框架框住唔自在,我係要冇框架。

王:可唔可以做上司,但我上面仲有個上司?如果畀我做老闆開pop-up store、咖啡店,會好開心,但應該好快就執笠㗎喇。做創作嘅人好難做呢個位,我唔可以自己簽自己,就係因為如果冇人框住我,就3年都交唔到歌,我最弱就係起框,要有人框住我。

4. 寧願煮飯 or 洗碗

王:我要煮飯洗碗一套做晒,其實煮緊時亦都已經洗緊。當我在廚房就唔畀人入嚟,唔想人搞自己個廚房,煮同洗碗我係真心enjoy。

周:梗係煮飯啦,我喜歡製造嘢,但怕執手尾。即係我喜歡做音樂多過宣傳,好享受在錄音室錄歌,錄到半夜都覺得係正。如果要宣傳到半夜就唔喇,所以煮飯同洗碗,即係做音樂同宣傳。

5. 聽歌寧願實體 or 數碼

周:好慚愧,屋企已經冇CD機,電腦亦都冇CD-Rom,只係有部遊戲機可播CD,已全部數碼化,搬晒上網。如果可以,我係想聽實體,好享受細個時要四圍去搵隻CD,去好多間舖頭問,然後老闆在櫃中拎出你想搵的那個版本,個感覺係好正。而家搵歌的確係方便咗,打個名就得,會冇咗耐性,無奈我都變咗數碼人。

王:梗係實體。有樣嘢係得實體畀到,數碼畀唔到,就係聽數碼音樂時,只會望住個mon,例如睇MV;聽實體,唔會掛住不斷吸收資訊,靠自己在腦內create畫面,想像空間更大,享受嘅dimension多於對住個mon,個interaction相對多啲。

6. 寧願天生是男人 or 女人

周:男人,雖然細個時都有諗:「如果我係女人就好啦。」大個咗就覺得唔係,做女人感覺上有好多唔方便、亦冇咁多顧慮。我塊面因細個時整傷而有疤,但覺得冇嘢吖,男人就係要有呢啲經歷,多條疤痕冇所謂。

王:絕對係男人,女人嘅唔舒服,係由朝頭早開始,又見暈又腫呀咁,呢啲麻煩好似係會跟你成世。但做男人,爽好多。

周:係囉,男人游水,唔記得帶底褲都照去。

王:女人就係有橙皮脂肪都唔好去泳池住。

7. 寧願別人更留意你內在美 or 外在美

周:初入行時,很想人哋留意我嘅裏面,希望人覺得我有內在美。而家覺得內在外在都唔緊要,做好自己先事半功倍。你覺得我外在正,就會有興趣知道埋我內在;如果內在好,但外在不修邊幅、一pat嘢咁,人哋都冇興趣去睇。除非我係世界頂尖,就唔使理外在,而家希望做到啲嘢係靚嘅,吸引人睇先,然後再令人留意埋裏面。坦白說,我覺得自己裏面仲唔夠叻,要再input多啲嘢,先可以內在行先。

王:內在。如果我內在係好,人哋都會覺得你外在都好埋;但外在好,就未必令人覺得係內在好。外在嘅美係美唔到入去,但入面嘅美,係可以美到出嚟。

(《沒女神探》上映日期:9月3日)

撰文:鄧龍傑

攝影:曾有為

編輯:鄺素媚

美術:勞偉健

髮型:Cliff Chan @ HAIR CORNER(周柏豪)、Zing Wong @ Hair Culture(王菀之)

化粧:Gigi Liu(周柏豪)、Janice Tao @ ZING the makeup school(王菀之)

場地:Hullett House

圖:超高智商的阿寶受失戀打擊而意志消沉。因一宗極棘手的謀殺案,上司(蔣志光飾)力邀她出馬。

圖:二世祖雖然名義上是老闆,卻沒有實權,公司行政全不能作決策。

圖:神探阿寶(王菀之飾)本來混入 o靚模當清潔工人查案,可是陰差陽錯下當上 o靚模。

圖:乸型二世祖是 o靚模公司老闆(周柏豪飾),卻愛上行為粗魯的女漢子阿寶。

圖:王菀之首次演武打戲,不懂武術的她笑言拍攝時雞手鴨腳,未打到對手卻自己扭傷肌肉。


2015年8月20日 Milk 735期

周柏豪.王菀之 引力.邊緣

「眾所周知,王菀之在她的音樂世界內,是SONGBIRD感覺很柔,但在她的電影世界裡,就有超過180度的改變,演出往往超乎你想像!拍攝《沒女神探》時,表現出她的專業,很捱得苦。」周柏豪說。「柏豪的幽默感比我想象中還要厲害,他轉數快和外型好呢個就係人都知,唔使我講……另外,他眼裡的光芒特別吸引人,不是只有外表那麼簡單。」兩位主角在訪問還未進入正題就已不斷互讚,他倆在《沒女神探》中,極力扭轉過往形象勢要令觀眾意想不到。不再阿愁不再阿杰,IVANA和柏豪又搞什麼飛機呢?

說得好玩,柏豪和IVANA可以用自己的作品來SUM UP這個《沒女》JOURNEY?「我在準備十月的音樂會,有REVIEW過自己的歌單,突然有一首過去八年我也沒諗起過的歌,就是〈多得你夢〉,是早期我創作的作品。裡面有一句:『要成就美夢變真需要勇氣』,原來伴著我成長的歲月中也要有這個MENTALITY,對於我在拍戲的JOURNEY上,是貼切的形容。」柏豪就選〈自由意志〉,「要『鬆開手銬』先可以彈得出那個手指尾(?留待下文分解),坦白說,接拍時就無畏,要演得好就得突破心理關口。」

MAN TO GIRL

冤家變情侶,周柏豪說《家有喜事》裡的家明和婉君,是他的首選:「嘩,連名都記得,印象當然深,家明婉君,記憶猶新。」柏豪說,這經典一PAIR,跟他與王菀之在《沒女神探》中的成大志和阿寶的設定有幾分相似,「女的好MAN,男的好CAM,好還在一種在我電影和音樂世界裡也沒做過的事,當然新鮮,又直又CAM,個性也頗複雜。我覺得,其實我的個性中也有一種乸的內在——但只限跟好友或髮型師玩時才會出現的『我』,外界是永遠接觸不到這個我,他是不見天日的,哈哈。」柏豪笑言,要由咁MAN變咁CAM,不只是拎起杯時豎起尾指那麼簡單,「要好柔,好女性化,不是外在和肢體語言那麼簡單。」相對於之前柏豪限界突破的《四非》的演出,《沒女》CAM佬也是挑戰一道。

SPARKLE PAKHO

回到「有些少錯摸的愛情關係」這個課題,IVANA(王菀之)的腦朋友就交出由ADAM SANDLER和JENNIFER ANISTON主演的JUST GO WITH IT,IVANA笑言口是心非愛在心裡口難開最有味道:「說到CAM CAM哋的朋友,我有好多朋友也這樣啦(笑),咁呢,明顯女仔特別鍾意HANG AROUND WITH這種『男朋友』,因為他們真性情、誠懇又信得過,女仔特別喜愛將自己的少女心事與他們傾訴。這些好友的『男性與女性同在』的特質,是最好的PROBLEM SOLVER!」自言豁出去演出阿寶的IVANA,說到戲中好CAM現實中都幾MAN的柏豪,她說,最愛他的幽默感和SPARKLE:「之前講過,吸引力源於內在,不是表面見到的CHARM咁簡單,柏豪絕對有呢種發自內心的吸引力。」啊!沒女同CAM佬有得諗呀!

《沒女神探》上映日期:9月3日

for pakho – hair:cliff chan @ hair corner makeup:gigi liu

for ivana – hair:zing wong @ hair culture make up:janice tao @ zing the makeup school


2015年8月21日 東方日報

王菀之蔣志光拍出安全感

藝人王菀之(Ivana)與蔣志光由公仔箱拍檔拍到大銀幕!貴為「最佳女配角」和「最佳新演員」的Ivana,坦言跟蔣志光(阿蔣)這位好拍檔合作,才令她拍得安心,阿蔣則希望繼影視合作後,音樂上能與Ivana再合作,擦出火花。

Ivana與蔣志光在電視劇《老表,你好Hea!》中大放笑彈,令人留下深刻印象。二人將在電影《沒女神探》中合作,飾演上司和下屬,將喜劇細胞發揮得淋漓盡致。

睇見造型就笑

貴為金像獎「最佳女配角」和「最佳新演員」的Ivana,謙稱自己仍是影壇新人:「呢部戲係攞獎前拍嘅,拍戲好講求拍檔同對手,好彩之前同阿蔣合作過電視劇,大家已有一定默契。我仲係個新人,喺片場一樣會驚,今次好在有阿蔣喺度做對手,令我放心好多。」她認為現階段,一個好對手令她更有安全感!

戲中Ivana有多個不同造型,她直言戲服造型可以幫助入戲:「着起套戲服,自己都笑咗先,有呢種感染力先可以再感染觀眾。」

冧到導演阿媽

阿蔣近年專注電視演出,久未拍戲,有一種陌生感覺,他笑言對上一部作品似乎也是葉念琛執導的作品,是否葉導演對他情有獨鍾?他笑說:「唔係,係佢阿媽鍾意睇我,所以搵我。」飾演警司的他,有場戲要在旺角鬧市中穿上魚造型的大公仔衫,惹來大批途人圍觀,感覺震撼。阿蔣說:「戲裏面同Ivana合作好難忘,我哋合作過電視、電影,希望將來有機會喺音樂上合作,望能擦出新火花。」

文:影視組

化妝:Janice Tao @ ZING the makeup School

髮型:Tim Lee @ Hair Culture

服裝:PAPAMAMSON

場地:Coffee Pro

圖:王菀之直認與蔣志光拍檔,令她安心!

圖:蔣志光有望跟王菀之在音樂上合作。

圖:王菀之化身神探查案。


2015年8月22日 蘋果日報

王菀之自愛幸福

王菀之(Ivana)與蔣志光由電視劇齊齊跳入銀幕,在《沒女神探》中繼續搞笑。兩人由歌手轉型到演員,出位同樣全憑喜感,Ivana表示演喜劇並非想像般容易,她已由當初緊張兮兮,到現在曉得享受演戲,她說:「對於拍一齣喜劇好唔好笑,觀眾會感受到演員當時嘅能量。」Ivana戲中演沒女,現實從沒這種感覺,她說:「沒女係乜都冇,我覺得乜都冇,都要有自信,因為係自愛嘅表現,要先愛自己,人哋先至愛你,好多嘢先至可以爭取,幸福可以自己爭取係唔難。」

蔣志光跟Ivana再演喜劇,他說:「演喜劇timing一定要好準,Ivana就可以做到好準,一個做喜劇嘅人一定要反應快、有變化同準確,佢有齊。喺《金雞SSS》睇到佢可以放低包袱,呢樣最重要。」

服裝:SKULLUMINOUS

化妝:Janice Tao of ZING the makeup school

髮型:Tim Lee of Hair Culture

場地:Coffee Pro

攝影:陳俊強


2015年8月26日 新浪網香港

王菀之 X Alex Fung:每一次Live都係挑戰

上年「菀之論」,一向「先聲奪人」嘅王菀之於演唱會中大跳Pole Dance,令台下樂迷為之驚嘆。Ivana多才多藝,似乎無論做戲定唱歌,佢都係喺唔同崗位、唔同角色發揮佢嘅小宇宙。今年Ivana的音樂會回歸歌藝同音樂,唔走視覺上嘅刺激,同有「音樂詩人」之稱嘅音樂監製Alex Fung(馮翰銘)一齊改編一個「全新嘅王菀之」,大家有幸會喺兩位同香港管弦樂團合作嘅音樂會上見證Ivana嘅小宇宙。

一首歌唱十次唔會易唱咗

雖然Ivana有唔少作品都有管弦樂元素,不過要今就係首次全管弦樂班底去演繹自己嘅歌。Ivana話:「其實呢個音樂會係香港管弦樂團邀請我哋去做嘅,我哋嘅音樂都有好多管弦樂嘅成份,特別係Alex嘅編曲、或者過去十年監製我嘅唱片同歌曲都擺咗好多Classic同管弦樂嘅元素。所以我哋都好期待成隊管弦樂團Live演奏嘅作品。」

Ivana對自己每次嘅演出都甚有要求,雖然今次演唱會唔會有太多嘅視覺刺激,不過Ivana就好認真咁話:「我覺得每一次Live嘅演出都係挑戰,從來都唔覺得唱返同一首歌,唱到第十次就會容易咗。係唔會嘅。每次嘅演繹都唔同,要睇聲音嘅狀態,又要睇自己想表達咩嘅情緒。

好似今次音樂會,選曲雖然揀咗啲大家聽過嘅作品,但係又唔會以original嘅形式去呈現。所以都會係一個全新嘅音樂會咁。」

Alex Fung:重新演繹新編曲難過學新歌

Alex Fung同Ivana合作十年,亦會監製今次同香港管弦樂團合作嘅音樂會,佢以監製身份去解說:「其實呢個演唱會對Ivana嚟講係個好大嘅挑戰。大家聽開嘅演唱會或者同港樂合作嘅音樂會大部分都係original嘅編曲或者類似嘅編曲居多嘅。歌手唔需要花好多力氣去諗段落。學新歌反而仲容易過重新演繹新嘅編曲。

重新演繹新嘅編曲難度在於佢已經好熟悉首歌,但你要佢將佢腦入面好耳熟能詳嘅嘢重新打散,頭擺喺尾,中間擺喺頭,重新調亂曬。其實佢係會傻咗。(Ivana聽完Alex一番解說突然冒咗句:「好驚啊!」)

咁所以,講起都驚,仲有廿首咁去傻。仲要記中間有啲段落其實你唔駛唱嘅,嗰個位可能突然係用音樂去演奏嘅,緊接你又要唱返。我覺得呢啲出入位,仲難過去唱一首新歌。因為唱新歌,你只要聽熟個demo,你記咗就得喇。呢樣真係好需要你對耳同音樂嘅靈敏度。」

Ivana:我要作首《蕉皮的聲音》

Ivana又補充話:「今次呢個音樂會嘅視覺應該係同樂器比較有關係。Alex應承咗我,話會比曬成個Station我去玩好多玩具,一啲發到聲嘅玩具。」

Alex就笑言:「今次大家見到嘅王菀之,未必係用舞蹈或者用大家通常見到嘅舞台效果為主嘅王菀之。可能係喺廚房打砂煲罌罉嘅王菀之,喺屋企梳化剝緊蕉皮嘅王菀之,唔一定要用口發聲嘅王菀之,大家都可能會見到。」(呢個時候,Ivana突然好興奮咁話:「你講完之後,我突然好想寫一首『蕉皮的聲音』。蕉皮係無聲 o架嘛。係咪好得意啊?」Alex:「邊個話?炸香蕉都有聲 o架。」

樂壇新詩三元素:歌者 填詞人 監製

唔少樂迷同媒體形容說話溫柔嘅Alex係「音樂詩人」,Alex聽完就笑:「嘩!我個嘴即時笑多30度啊!」(Ivana:好犀利啊!)

Alex嘗試去解釋話:「好勁啊呢個名。其實好得意嘅一件事係我之前出咗一隻碟叫《樂章》,入面確實係將好多中國嘅我哋由細讀到大嘅詩,由《將進酒》到新詩《再別康橋》擺落去。好得意嘅地方係我同王菀之合作呢十年呢,我彷彿見到好多新詩。好多由黃偉文墳嘅歌詞如《小團圓》、好多由林夕填嘅詞如《留白》、《我們他們》,我覺得佢哋係真真切切用筆去寫文字嘅樂壇詩人,我諗我係用音符嘗試將佢哋嘅詩意呈現出嚟囉。

Ivana嘅聲音都好Poetic。大家覺得佢係好天使嘅聲音。但我覺得唔單止係天使。如果大家有聽開王菀之嘅歌,佢嘅咬字係有別於一般流行歌手嘅咬字。對於我嚟講,佢嘅咬字係幾Poetic嘅。所以我好開心。因為三個party都係一啲Poem嚟嘅。」

每個人心入面都有個Inner Child

Ivana話今年就未必出得切新專輯,不過歌都會繼續派,好似嚟緊嘅主打歌《小俠》仲係同港樂合作音樂會嘅主題曲。Ivana話:「呢首係今年我第一首作曲填詞嘅歌,我好耐都無填過詞喇。《小俠》係講每個人心入面都有個inner child,佢好勇敢,會發光,有好奇心又creative又善良嘅。如果你長大咗之後你都肯拖住佢嘅手一齊行,你就會發光芒,你就會Powerful喇!」

Alex仲叮囑大家一定要聽呢首主題曲:「如果大家想知呢個演唱會係咩回事,大家一定要去聽呢首《小俠》。因為佢係將130分鐘嘅演唱會濃縮成4分鐘。喺入面經歷小小嘅旅程,大家再將佢放大20幾倍就係我哋呢個音樂會。」

訪問尾聲,問了Ivana仲有咩想挑戰自己呢?Ivana答:「我覺得視覺、舞台都會互相inspire到我去做另外一個演出。我仲有好多嘢都可以做到 o架!不過自己都搵緊,一路搵一路做一路學,就係我嘅動力之一。我而家嘅夢想都係想做一個稱職嘅performing artist,希望喺唔同嘅stage,無論係音樂嘅stage,舞台劇嘅stage定係電影嘅stage,我都希望做到自己最好。」


2015年8月28日 on.cc

王菀之蔣志光孖住放笑彈 想「樂」鬥一番

【on.cc東網專訊】藝人王菀之與蔣志光的搞笑天分不用置疑,二人在電視劇《老表,你好Hea!》中的角色大放笑彈。二人在電影《沒女神探》中再度合作,飾演上司和下屬的關係,再將笑料放送給觀眾。在香港電影金像獎獎禮,中勇奪「最佳女配角」和「最佳新演員」的王菀之謙虛表示,自己仍是影壇的新人,故拍電影時很需要一個好拍檔互相扶持,而與蔣志光之前合作過電視劇,大家有一定默契和信心,令她可以放心拍攝,她表示:「我依然係一個新人,片場上我依然會驚,所以對手對我嚟講係好重要,今次好在有蔣志光喺度,令我好放心。喺我呢個階段嘅演員,仲係需要一個好對手令我有安全感。」

蔣志光近年在電視圈發展,笑言對電影有一種比較陌生的感覺,他說:「對上一部作品好像亦是葉念琛執導的作品。(葉導演對你情有獨鍾?)唔係,係佢媽咪鍾意睇我,所以搵我。」戲中他飾演一位警司,有場戲需要在旺角鬧巿中穿上魚造形的大公仔衫,結果惹來大批途人圍觀,他表示拍攝時感到場面震撼。蔣志光表示戲中與王菀之拍攝每一場戲均感難忘,還表示與王菀之合作過電視和電影,希望有機會在音樂上合作。

圖:王菀之表示與蔣志光合作拍戲,令其感到有安全感,可以放心演繹角色。

圖:王菀之(右)與蔣志光再次在新戲中合作,大放笑彈。

圖:王菀之表示自己是影壇中的新手,還有很多事要學習。

圖:蔣志光表示下次想同王菀之合作玩音樂。


2015年8月28日 新Monday 778期

蔣志光 王菀之 相逢何必曾拍戲?

蔣志光(阿蔣),明明筆者未出世,佢已經加入咗娛樂圈,點解嚟到今時今日,先恍如寶物尋歸底?王菀之(Ivana),唱而優則演,上年先加入影圈,一次過攞晒「最佳新演員」同「最佳女配角」,影壇後起之秀……睇落好似行喺唔同路上嘅兩人,其實都有唔少共通點:創作人、歌手、心底文靜卻係喜劇能手,因為呢啲原因,令兩人相逢,亦係筆者第一次為電影訪問,被訪者會jam歌打beat,呢啲係咪成日講嘅火花?

R:蔣志光  I:王菀之

最緊要夾人

最初知道會同蔣志光、王菀之做訪問時,心頭泛起1個疑問,兩個咁截然不同嘅人,喺同1套劇集(《老表,你好hea!》)成功彈出後,今次喺新戲《沒女神探》再合作……阿蔣直言,有火花係因為夾人比夾戲更重要!

今次《沒女神探》合作覺得如何?

R:「我好少睇自己嘅作品,我留意嘅係對手嘅表現。點樣配合對手,我哋之間又可以產生咩效果?對手做成點,對我嚟講緊要啲!佢做得好唔好,我會重視過自己嘅表現,我做得好,贏到對手咁又點?我而家追求嘅唔係呢樣嘢,而係兩個喜劇演員點樣去完成1場戲緊要啲。」

I:「咁講好驚喎!阿蔣!」

R:「唔係……點解我會咁講呢?因為2人表現配合,係好睇過1個人,就好似2個人嘅duet,絕對會精采過1個人嘅solo!」

I:「不過又係真,聽到阿蔣講嘅呢番說話,我喺舞台劇訓練嗰時有人講過,如果係有對手嘅時候,剩係掛住搶戲,出到嚟絕對係唔好睇 o架!係要1個抑揚頓挫、1個左、1個右,咁出嚟先會靚,所以演戲都係咁樣。」

阿蔣有安全感

呢條點都要問 o架喇!點睇Ivana呢位後輩先?

R:「只要你係創作人,一定俾好高分數,咁Ivana係創作人,所以我都會俾好高分數佢,因為創作係從0開始,係好值得讚賞。演戲更加唔使講,天分非常之高,鏡頭前後係兩個人,roll咗機佢可係熱情奔放,但鏡頭後係個文靜嘅人,佢係可以將藝術同現實分得咁開,實在難得!」

Ivana對呢位前輩又有咩睇法?

I:「我嘅感覺好簡單,當我知道今日係同邊個對戲,係阿蔣的話,心入面都會覺得:『好呀!』有份安全感同溫暖,而呢份感覺對於我as 1個咁green嘅演員嚟講,係好緊要,如果係要對一啲好陌生、冇也溝通過嘅演員,份恐懼係會唔知點,但同阿蔣演呢,除咗好似有個老師喺隔籬特別放心之外,亦特別夠膽做,因為知道佢會喺我做錯咗嘅時候,話俾我聽要點tune,就係呢份放心會令我發揮大啲。」

R:「呢點我覺得好緊要,好似Ivana咁講,我建立嘅係1個安全型嘅老師形象,而唔係1個好勁好pro嘅人,兩件事出嚟嘅效果係完全唔同。如果我建立出1個好pro嘅形象,對方都會好驚好怯……」

I:「你又知我冇?」(一齊大笑)

上映日期:9月3日

text – aMan photo – billy video – sun make up – Janice Tao @ ZING the makeup school hair – Tim Lee @ Hair Culture wardrobe – Skulluminous location – Coffee Pro design – Hin

圖:戲中飾演 o靚模嘅Ivana話:「戲服造型可以幫助入戲,着咗套衫,自己都識笑,就係要有呢種感染力,先可以再感染觀眾。」

圖:阿蔣:「1個喜劇演員知道邊個位會得到掌聲,但嗰個位未必係最好睇。」呢個訪問真係學到好多嘢!

圖:因為訪問當日,要現場收音嘅關係,攝影師用拍手嚟試聲,兩人聽到1下拍手聲,即刻接住jam落去,free flow咁打beat,我都好期待兩人喺音樂上會有合作。Ivana話:「或者可以1首歌,1人寫一半。(笑)」

圖:阿蔣言語間透露:「戲中同Ivana合作好難忘,我哋合作過電視、電影,希望將來有機會喺音樂上合作,有啲新火花俾大家。


2015年8月28日 Harper’s Bazaar

王菀之的簡單平衡護膚之道

By Cathy Lam

唱而優則演的王菀之,首次擔正女主角的喜劇電影正式上畫,繼早前完成舞台劇演出後,緊接準備與香港管弦樂團合作的音樂會,而在馬不停蹄的工作日程中,Ivana 透過簡單方案去保養肌膚,也會「飲」與「食」得健康。

HB:在忙碌日子裡,怎樣去護理肌膚?

IW:保持清潔及做好保濕,而護膚的重任就交給化妝師,她會用我慣常用和揀選合適的護膚品,於上妝前替我按摩面部、頸及耳背,「叫醒」皮膚,每次都感覺好舒適,皮膚煥然一新。

HB:最基本的護膚步驟是甚麼?

IW:首要是清潔與適當保濕,因皮膚本身「懂得」維持天然平衡,不需要使用太多的護膚品、太複雜的護膚程序,只要揀對適合自己皮膚的產品就可以。

HB:可否分享一些護膚心得?

IW:我偏愛蘊含天然成分的護膚品,太多化學成分始終不太好。其實多飲水,配合休息,加做運動與適當的護膚品,就已經集齊 90% 護膚方面的重要元素。

HB:不用工作的日子還會化妝嗎?

IW:不會,會讓皮膚「抖下」!但出街見人會搽少許遮瑕膏,塗抹有色潤唇膏,令面部有血色。

HB:有沒有噴抹香水的習慣?

IW:睇心情多於場合,喜歡清新氣味的香水,特別喜歡自然的茉莉花香氣,我認為一支香水可以「嗅」出個人的年紀。

HB:在運動方面有沒有特別的喜好?

IW:小時候會打羽毛球、乒乓球、玩溜冰及跳高,現在的興趣是學跳舞,跳舞本身的運動量很大,體力的要求好高。學過踢躂舞、當代舞及鋼管舞,現在想繼續學鋼管舞,不想浪費已學到的基礎功,而且想再跳得好一點!

HB:學習跳舞為妳帶來哪方面好處?

IW:跳舞本身很美,可以幫助舞台上的演出,自己喜歡又好玩!透過跳舞維持運動量,同時具不同的挑戰性,好像踢躂舞講求彈跳力;當代舞講究柔軟度;而鋼管舞就是力的表現。

HB:如何消減壓力?

IW:我屬於天生感性的人,易有壓力,亦很容易開心,覺得適當的壓力會是個人的「燃料」,其實最重要是本身的心態。減壓的方法就是在不影響別人的情況下,做自己喜歡做的事,如睇戲、聽音樂、砌 lego,或約朋友見面及夾 band 等。

HB:於日常生活中會否節制飲食嗎?

IW:基本上已戒喝凍飲,但也會吃辣及飲咖啡,偶然會「放縱」自己,吃一頓豐富的火鍋;因雞皮含大量脂肪,吃炸雞翼及雞肶時會用刀背去油,吃白切雞就一定會去皮。

HB:可否提供一些健康飲食的貼士?

IW:早已養成飲用大量清水的習慣,每日都會吃蘋果、香蕉,喜愛吃不同的蔬果,建議飯前飲水,避免出現飽肚情況,而且會先吃蔬菜後吃飯類。

Photo by Steven Cheung; Coordinationed by Alva Chung Location: Sáv Hotel


This entry was posted in 未分類. Bookmark the permalink.